मुस्लिम समुदायले आज ईदुल फित्र पर्व मनाउदै
काठमाडौं, भाद्र ४, इस्लाम धर्मालम्बीहरुले आज आफ्नो महत्वपूर्ण चाड ईदउलफित्र पर्व मनाउँदैछन् । आत्म संयम र शुद्धिका लागि एक महिनासम्म बसेको व्रत सकिएको भोलिपल्ट अर्थात आज इदउलफित्र मनाउन लागिएको हो । रमजानको एक महिनाको व्रत हिजो साँझ चन्द्रमा हेरेपछि सकिएको हो ।
यस पर्वका दिन मुसलमान समुदायका मानिसहरूले बिहानै देखि नुहाई धुवाइ सफा लुगा लगाएर ईदगाह, मस्जिद वा खुला मैदानमा भेला भएर सामूहिकरुपमा प्रार्थना गर्ने र एक आपसमा अङ्गालो हाली ईदको बधाई तथा शुभकामना आदानप्रदान गर्ने गर्दछन । रमजानलाई दान गर्ने समयको रुपमा लिइने भएकोले गरिब तथा असाहयलाई दान दिने तथा सेवैया, दुध र चिनी मिसाइएको गुलियो परिकार प्रसादको रुपमा ग्रहण गर्ने चलन रहेको छ । ईदको अवसर पारेर नेपाल सरकारले आज सार्वजनिक विदा समेत दिएको छ ।
यस पर्वको उपलक्षयमा राष्ट्रपति डाक्टर रामवरण यादव, प्रधानमन्त्री डाक्टर बाबुराम भट्टराई लगायतले ईदको अवसरमा मुस्लिम समुदायलाई शुभकामना दिनु भएको छ ।
